Alban Skënderaj është një ndër artistët më të dashur në muzikën shqiptare prej vitesh. Çdo festival në të cilin ai merr pjesë është e sigurt që do të shpallet fitues. Këngët e tij kthehen në mënyrë të menjëhershme në hite dhe për këtë nuk kemi dyshim. Prej më shumë se një dekade, Albani duket se ia ka dorëzuar zemrën, këngëtares simpatike Miriam Cani, me të cilën ka dhe një vajzë, të quajtur Ameli. Megjithatë Skënderaj vazhdon të pëlqehet nga publiku femëror në të njëjtën mënyrë si kur doli në fillim në ‘Top Fest 2’ me “Vetëm Ty”. Është po aq romantik sa dikur dhe këtë e tregon me anë të teksteve që shkruan. RevistaWho.Com ju kujton sot disa nga këngët ku Alban Skënderaj i tha Miriamit “Të dua”, por që ne nuk e kuptuam . Eh sa vajza do të dëshironin diçka të tillë…
“Një herë në jetë”: Atëherë kur të gjitha vajzat ëndërronin një lidhje me Albanin “flokëgjatë”, ai vendos t’i surprizojë, duke u shfaqur në një klip me të dashurën e tij. “Një herë në jetë” ishte hera e parë ku çifti shfaqeshin bashkë dhe pranonin lidhjen e tyre. Albani në të atë kohë i thoshte Miriamit: “Je ajo që vjen një herë në jetë, sa dua të t’dua”.
“Mirëmëngjes”: “Më jep një kafe të lutem një dopio Express”. E kush nuk do t’ia jepte Albanit një kafe? Por ne më kot lodhemi, ai ia kërkon vajzës që i ka rrëmbyer zemrën. “Të harrohem me të e të bëhemi një” i drejtohet këngëtari Miriamit. Çfarë dëshirash!! Tashmë duket qartë që i kanë realizuar.
“Nëse thua po”: Ishujt Maldive, nën det, parajsë tokësore, fjalë të bukura, propozim, të gjitha këto nuk do të mjaftonin për ta bërë të lumtur Miriamin. Por për ta mbyllur duhej dhe një klip, që të gjitha vajzat të bëheshin “xheloze”, se pse nuk kishin marrë kurrë një surprizë të tillë. Ehhh, le të vazhdojmë të ëndërrojmë, ndërkohë që “Ajo tha po”.
“Let me die with you”: Dueti i parë mes çiftit Skënderaj-Cani, ku të gjithë adhuruan pasionin dhe romancën që ata gëzonin do të ishte “Let me die with you” . “Lërmë të digjem në flakët e zjarrit që ndezëm të dy”, i thoshte dhe këtë herë Albani të dashurës së tij. Ata ndërkohë vazhdojnë të digjen në këtë zjarr. Këtë e tregojnë vitet e shumta që vazhdojnë të jenë bashkë.
“Unë dhe ti”: Më thoni një dasmë ku keni shkuar dhe çifti nuk ka kerkuar të vendoset kjo këngë?. “Unë dhe ti” u bë hiti i pavdekshëm i dashurisë. Sa reale dhe platonike duket kjo këngë, aq më e bukur bëhet kur kupton që është dedikim i vërtetë ndaj njeriut të zemrës. “Unë dhe ti, që ndamë dhe të fundit kafshatë, duke thënë sesa jemi me fat, sa njeri – tjetrin të kemi për krahë në cdo natë”. Lum ti Miriam çfarë fjalësh dëgjon!!
“Engjëll”: Dhe për t’i vendosur vulën këngëve, ku Miriamit i thanë “Të dua”, kemi përzgjedhur “Engjëllin”. Nga fillimi deri në fund të klipit, çifti shfaqen bashkë dhe brenda tekstit thuhet fare qartë, se çdo hit i tij i dedikohet të dashurës që ka zgjedhur të ndajë jetën. “Engjëll, ndoshta tani më kupton, kur të thoja me ty lërmë të vdes, kur provoja të them mirëmëngjes. Engjëll më beso, gjithmonë ke qënë ajo”…
