Të guxosh dhe të shfaqesh ndryshe nuk është e thjeshtë, sepse gjithmonë duhet të marrësh parasysh rrezikun se jo të gjithë do ta presin mirë idenë tënde. Prandaj shpesh shohim artistë që vijnë në të njëjtin stil, duke preferuar të mos dalin jashtë kornizave apo zonës së komfortit. Megjithatë ka dhe nga ata që bëjnë të kundërtën dhe marrin përsipër rreziqe. Një ndër to është Ronela Hajati, e cila nuk i ka marrë asnjëherë parasysh risqet dhe gjithmonë ka arritur të pëlqehet nga publiku.
Ndoshta nuk ka mundur t’i fitojë zemrat e të gjithëve dhe kjo është diçka e zakonshme, por ama vëmendjen e të gjithëve e ka fituar gjithmonë. Ronela ka vite që është pjesë e industrisë së muzikës dhe asnjëherë nuk e kemi parë të qëndrojë e njëjta. Sa herë që ajo publikon një videoklip të gjithë janë kuriozë të shohin transformimin e saj të radhës, apo të zbulojnë karakterin që ka dashur të përcjellë përmes një video muzikore.
Nëse u hedh një vështrim të gjithë klipeve që ka publikuar deri më sot mund të kuptosh se Ronela është një detajiste e shkëlqyer. Të gjitha projektet e saj muzikore janë të kuruara dhe sigurisht ‘look-u’ i Ronelës është gjithmonë ‘on top’. Ndryshe nga të tjerët që zgjedhin të ruajnë të njëjtën linjë në videoklip, Hajati ka bërë të kundërtën.
Vetëm në një pjesë shumë të vogël të projekteve të saj Ronela mund të jetë shfaqur njësoj, ndërsa në rastet e tjera transformimet e saj janë të shumta. Pikërisht për këtë gjë fansat e kanë dashur dhe vazhdojnë ta ndjekin Ronelën për çdo performancë të saj, ndaj ajo ka premtuar që do të mbetet gjithmonë e njëjta. Këngëtarja ka treguar se në jetën reale është tërësisht ndryshe, por gjithçka e bën për fansat e saj, ndaj puna që ka bërë gjatë gjithë këtyre viteve është vërtet për t’u vlerësuar. /revistawho.com
