Selvija Jao, bashkëshortja e artistit të ndjerë Shpat Kasapi, ka prekur sot ndjekësit e saj në rrjetet sociale me një postim mjaft emocional. Ajo ka udhëtuar drejt Italisë së bashku vetëm me djalin e tyre, Roelin, duke ndarë publikisht dhimbjen që po përjeton pas humbjes së bashkëshortit.
Në një “Instastory”, Selvija ka publikuar një foto të biletave të avionit me destinacion Milano, për datën 14 dhjetor, ku shkruante: “Sot do doja më shumë se gjithçka të kisha edhe biletën tënde në dorë”, shoqëruar me këngën e Shpat Kasapit “Kujtime m’ke lan”.
Ky udhëtim mbart një peshë të veçantë emocionale, pasi vetëm pak javë më parë Shpat Kasapi u nda nga jeta në Itali, vend ku kaloi momentet e fundit.
Sipas burimeve pranë familjes, udhëtimi lidhet me vizita dhe trajtime të specializuara për Roelin, i cili ka nevojë për ndihmë në lidhje me të folurën. Selvija ka vendosur të vazhdojë rrugën që kishin nisur së bashku si prindër, duke u rikthyer në vendin ku përjetoi humbjen më të madhe, për të mirën e djalit të saj.
