Mbrëmjen e djeshme emisioni ‘Soiree’ mblodhi të gjithë të afërmit dhe bashkëpunëtorët që kanë pasur fatin të punojnë me artistin e madh Françesk Radin. Bashkëshortja e tij, Tefta Radi, u shfaq pas një mungese të gjatë në ekran dhe ndau me të gjithë detaje të shumta nga jeta me Françeskun.
Mes emocionesh Tefta tregoi se e ndjen shumë mungesën e personit me të cilin ndau pjesën më të madhe të jetës. “Takoj miqtë e Frankos që më rrinë shumë afër, takoj kolegët e mi, por Franko më mungon shumë”, ka thënë Radi e përlotur. Më pas ajo ka treguar ditën e fundit me partnerin e saj. “Ishte e dielë, më kishte ardhur vëllai nga Australia, ishim në Petrelë në një zonë të bukur, drekuam me miqtë tanë, me Mark Lulin dhe bashkëshorten e tij. Ishte një ditë plot humor, plot batuta, sepse një nga të veçantat e Frankos ishte humori i tij, buzëqeshja e tij e ëmbël dhe humori me batuta që të bënte të flakje tej çdo lloj nervozizmi. U kthyem në shtëpi rreth orës 6. Pas gjysëm ore pushimi u fut në studion e tij. U ul për të punuar. Ishte duke përgatitur 5-6 këngë para se të largoheshim për në Australi në një recital që do t’i realizonte tek Alban Dudushi me tenorin Kastriot Tusha. Ishin këngë të zgjedhura, këngë të bukura, napoletane, për t’i pasur si kujtim dy miq. Kishim dy ditë që kishim filluar provat. Ndodhi ajo çudia që ndodhi. Punoi dy orë e gjysmë. Nga ora 9 u ulëm për të parë një koncert në ‘Rai’ në Arena di Verona, bëhej me gratë artiste italiane me Loredana Bertè etj dhe të gjithë fondet do të kalonin për gratë e dhunuara. Ishte koncert brilant. U kënaqëm dhe nga ora 1 ramë për të fjetur. Franko ra në gjumë dhe nuk u ngrit më”, ka rrëfyer Tefta Radi.
Ndër të tjera ajo ka treguar se pengu më i madh i Françeskut ishte fakti që atij ju ndalua veprimtaria e tij si kantautor për dy dekada me radhë. Françesk Radi ishte një artist shumë modern dhe kjo nuk ishte diçka e pranueshme për kohën. /revistawho.com
