Shumë shpejt pritet të nis transmetimi i ‘The Voice Kids 3’, një nga formatet më të ndjekura për fëmijë. Por këtë vit do të rikthehet me ndryshime të shumta, duke nisur nga moderatorët dhe trajnerët. Pak kohë më parë u zbulua se Dojna Mema do të zërë vendin e Ledion Liços në prezantim. Së fundmi, Eneda Tarifa ka treguar se nuk do të jetë më pjesë e grupit të trajnerëve. Pas një viti mjaft të suksesshëm, Eneda ka thënë se për shkak të angazhimeve personale nuk mund të jetë në ‘The Voice Kids 3’. Këngëtarja i ka uruar suksese pjesës tjetër të grupit dhe fëmijëve.
“Miqtë e mi, ju informoj me shumë dashuri se për shkak të impenjimeve personale, plane dhe projekte televizive tepër të rëndësishme për mua, nuk mundet që këtë vit të jem pjesë e jurisë së ‘The Voice Kids 3’. I uroj suksese miqve të mi në sezonin e ri, Aleksandër Gjoka, Renis Gjoka, Miriam Cani dhe veçanërisht Ledion Liços për këtë bashkëpunim mbresëlënës. Suksese të gjithë fëmijëve. Le të fitojë më i miri”, – ka shkruar Eneda në postimin e saj. Tashmë pritet të zbulohet se kush do të zërë vendin e Enedës në këtë edicion të ri të ‘The Voice Kids’. /revistawho.com
