Dy të dashuruarit tërheqës të këtyre kohëve, Miranda Kerr dhe Evan Spiegel po planifikojnë dasmën. “Do të jetë vitin e ardhshëm”, ka thënë supermodelja në një intervistë për Female First. “Mezi po pres”. 33-vjeçarja ka treguar detaje nga propozimi, duke thënë që kishte qenë plotësisht surprizë. “[A e prisja?] Absolutisht jo,” ka thënë ajo. “Ai më tha, ‘Miranda, po ta them që tani, kjo është hera e parë dhe e fundit që po gjunjëzohem para teje’. Unë isha shumë e emocionuar, po dridhesha nga lumturia”. Themeluesi 26-vjeçar i Snapchat-it ia ka bërë pyetjen në qershor dhe në atë kohë Kerr e postoi foton me unazë në Instagram.
Kjo do jetë dasma e dytë për modelen, e cila ka qenë më parë e martuar me Orlando Bloom për tre vjet. Ata kanë një djalë bashkë, Flynn, pesë vjeç, i cili ka krijuar një marrëdhënie të mirë me partnerin e ri të mamasë.
“Ata e adhurojnë njëri tjetrin, ka thënë Kerr. “Në fillim isha shumë e kujdesshme sepse doja të sigurohesha që marrëdhënia jonë ishte serioze. Tani më pëlqen kaq shumë kur i shoh të luajnë bashkë.”
Ish-modelja e Victoria’s Secret Angel ka shpjeguar çfarë e forcon marrëdhënien e saj të re “Evan është një djalë shtëpie si unë. Ne organizojmë festa të vogla me miqtë, atij i pëlqen shumë të gatuajë. Të dy jemi tipa bashkëbisedues edhe pse vijmë nga botë të ndryshme, por kemi vlera të përbashkëta, ndjenjën e besnikërisë, familjes dhe ndershmërisë. Unë u besoj njerëzve më lehtë. Evan është më i kujdesshëm dhe i rezervuar. Është një baraspeshë e mirë”.
