Monika Kryemadhi ishte e ftuar në emisionin “Ndryshe” me Salsano Rrapin dhe Elona Duron në Top Albania Radio, ku foli për rolin e saj si opinioniste në edicionin e pestë të “Big Brother VIP”, por edhe për çështje personale që vijojnë të zgjojnë interes publik.
Që prej nisjes së këtij sezoni, Kryemadhi është pjesë e panelit të opinionistëve krah Arbër Hajdarit, ndërsa gjatë intervistës u përball edhe me një pyetje direkte lidhur me ish-bashkëshortin e saj, Ilir Meta, i cili ndodhet aktualisht në burg.
Salsano e pyeti nëse e kënaq ideja që Meta e ndjek atë nga burgu, por përgjigjja e Monikës ishte e menjëhershme dhe e prerë.
“Jo, nuk më kënaq”.
Biseda vijoi më tej, ku Kryemadhi sqaroi se nuk bëhet fjalë për paragjykim, por për një distancë të qartë që ajo dëshiron të mbajë.
“Jo, nuk është se kam mendim se më paragjykon, por nuk dua të kem asnjë lidhje me të”, u shpreh ajo, duke nënvizuar se nuk ka asnjë interes për të ndarë mendime apo lidhje me të kaluarën.
E pyetur nëse lexon komentet që bëhen për të, Kryemadhi u përgjigj shkurt:
“Jo”.
Ndërkohë, sa i përket “Big Brother VIP”, ajo theksoi se ky sezon përbën një sfidë të rëndësishme për produksionin dhe për të gjithë ata që janë pjesë e formatit.
“Mendoj se kjo është një sfidë e produksionit në radhë të parë, por edhe unë si një pikë në këtë oqean në këtë produksion, është sfida jonë për ta kthyer Big-un në një instrument, që të mos bëhemi kopje e çdo bigu, por çdo Big të ketë individualitetin e vet… bëni lojën tuaj, jo kopjen e Big-eve të tjera”, u shpreh ajo.
