Moderatorja e njohur e ‘Top Channel’, Albana Osmani, prej kohësh ka ndërmarrë një fushatë sensibilizuese në ndihmë të fëmijëve të sëmurë me Leucemi. Shitja e bluzave me logon e ‘Je një luledielli’ është mbështetur nga shumë njerëz të thjeshtë dhe të njohur, madje edhe jashtë kufinjve. Të gjitha fitimet janë dërguar në ndihmë të fëmijëve të sëmurë. Pak muaj më parë Albana arriti të vishte me këto bluza Kuvendin e Shqipërisë. Tashmë ajo ka shkuar në Kosovë dhe të njëjtën gjë ka bërë me anëtarët e parlamentit të atjeshëm.
E lumtur për këtë arritje, ajo ka ndarë foto në profilin e saj në ‘Instagram’ me përshkrimin: “Të gjithë bashkë për ardhmërinë, për fëmijët! Deputetët Kosovarë pa dallim etnie në mbështetje të kauzës së ngritur për Fëmijët e Kosovës”.
Më tej ajo ka falënderuar edhe presidentin e Kosovës i cili po ashtu doli në mbështetje të ‘Je një luledielli”.
“Faleminderit Presidenti i Kosovës Z.Hashim Thaçi për mbështetjen tuaj njerëzore dhe institucionale në kuadër të kauzës së ngritur për Fëmijët Shqiptare të Kosovës në QKUK në Prishtinë! Një luledielli shkoi drejt e në instancat më të larta të shtetit, tashmë të pavarur prej 10 vitesh, në Kosovë për të përmirësuar kushtet e Vogëlusheve që po kurohen dhe janë shtruar në Spitalin Shtetëror . Gëzohem që në planet e punës së Shtetit tashmë u vendos një dritë Dielli më shumë. Ndër shumë përballje e problematika të vendit, tashmë kauza e ngritur për Fëmijët, u rendit ndër prioritetet! Të gjithë po vishen me bluzat luledielli dhe Dardan si njerëz, si prindër, nga çdo etni, nga çdo status e influencë, pavarësisht nëse janë të parët e shteteve, lider të fuqishëm apo njerëz të thjeshtë që gjithçka që kanë janë vetëm ato 20 Euro për të blerë një bluzë dhe nga zemra po japin kontributin e tyre! Luledielli e fëmijëve, fluturo e lirë dhe dhuro buzëqeshje tek ata që MERITOJNË gjithçka, FËMIJËT! Faleminderit Zot MIRËNJOHËSE TY për çdo hap, për çdo shteg që po hap në favor të fëmijëve mbarë shqiptare”, -shkruan Albana./revistawho.com
