Është gjithmonë koha e duhur që t’i motivojmë të rinjtë e vlerave, sepse tek ata gjejmë shpresën e një Shqipërie më të mirë!
2020 ishte një vit, që meriton të mbyllet me pozivitivitetin që përçon projekti “TiRINI”, i cili ka në fokus promovimin e modeleve të suksesit nga radhët e të rinjve, në fusha të ndryshme. Ju ftojmë t’i ndiqni dhe le të shërbejnë si frymëzim, për këdo që është në mëdyshje nëse do ta bëjë ëndrrën, një realitet! Momenti të çohemi nga vendi ku rrimë ulur, të punojmë fort dhe të ndjekim rrugën e këtyre modeleve, që do i sjellim në “Lart e Poshtë” gjatë këtij sezoni festiv.
Talenti lind, ndërsa puna e bën atë të përkryer.
Klaudio Zoto vjen nga një familje muzikantësh, dhe numëron më shumë çmime sesa vite jete ?Maturanti ekselent i Liceut Artistik “Jordan Misja” e ka përfaqësuar në mënyrë dinjitoze Shqipërinë, në shumë konkurse ndërkombëtare. “E ardhmja ime në vend është e sigurtë, sepse kemi artistë shumë të mirë këtu. Edhe pse do kisha dëshirë të merrja një kulturë tjetër, duke qenë se dhe muzika është një miks i kulturave të ndryshme dhe prandaj ndoshta do të shkoj dhe unë jashtë,” – kështu e parashikon të ardhmen, artisti i talentuar.
Në moshën 6-vjeçare ka nisur të studiojë për violinçel, nën drejtimin e mësueses Ridvana Selita. “Tipari kryesor që spikat tek Klaudio është talenti, po aq sa dhe ndjeshmëria muzikale. Në këto 12 vite punë si mësuesja e tij, vërej vetëbesim dhe këmbëngulje në nivele të larta. Kujtoj një rast, që menjëherë pas koncertin të një ditë më parë; direkt të nesërmen ka ardhur në shkollë me materiale, për të vijuar leksionet,” – ka cituar znj.Selita.Koncertin e tij të parë e realizoi vetëm 6 vjeç, në hollin e TKOB. Pas një viti, Klaudio fiton çmimin e parë në konkursin “ArsKosova”, duke hapur kështu siparin e çmimeve të njëpasnjëshme që do të rrëmbente. Përmendim trofetë e vendit të parë në konkursin “Tirana Talent” (çmimi i Virtuozit); në kompeticionin “Agimus”, Padova; konkursin “Euritmia”, Udine; kompeticionin “Polyhymnia International”, Shkup dhe kompeticionin “Pjetër Gaci”.
Mes rezultateve të shkëlqyera, suksesit artistik dhe shoqërisë së tij, Klaudio e ka çdo ditë të mbushur plot, duke jetësuar ëndrrat dhe dëshirat e fëmijërisë së hershme. Ne i urojmë suksese! Nëse ylli i suksesit i ndrin sa më lart dhe gjatë të rinjve si ai; shoqëria jonë do jetë akoma më e bukur dhe shpresëdhënëse!
Ndiqni episodin e parë të “TiRINI” në linkun në bio!/revistawho.com
