Një natë që duhej të ishte argëtuese, përfundoi me një skandal viral për CEO-n e kompanisë “Astronomer”, Andy Byron. Teksa po kërcente në një koncert të Coldplay në Massachusetts, kamerat e kapën duke përqafuar një grua – e cila nuk ishte bashkëshortja e tij, por kolegia e punës.
Gjithçka u përhap me shpejtësi në rrjetet sociale, sidomos pasi frontmani i Coldplay, Chris Martin, e komentoi situatën drejtpërdrejt nga skena me një batutë që tani duket profetike:
“Shikoni këta të dy. Ose janë në një lidhje jashtëmartesore, ose janë thjesht shumë të turpshëm.”
Çifti u largua menjëherë sapo kuptoi se ishin në ekranin gjigant, por pamjet ishin tashmë bërë virale. Përballë presionit publik, Byron reagoi me një deklaratë ku kërkoi falje dhe la të kuptohet se grupi muzikor kishte një rol në këtë ekspozim të papritur:
“Ajo që duhej të ishte një mbrëmje muzike dhe gëzimi, u kthye në një gabim personal që u bë publik në një skenë shumë të madhe,” – u shpreh ai.
Në mesazhin e tij publik, CEO-ja kërkoi ndjesë ndaj familjes dhe stafit të tij, duke shtuar:
“Ju meritoni më mirë nga unë, si partner, si prind dhe si drejtues.”
Byron deklaroi se do të tërhiqet për pak kohë për të reflektuar dhe për të vendosur për hapat e ardhshëm:
“Po marr kohën e duhur për të reflektuar, për të marrë përgjegjësitë dhe për të vendosur për hapat e ardhshëm, si në jetën personale ashtu edhe në atë profesionale.”
Ai përfundoi me një kritikë ndaj faktit që momenti i tij privat u shndërrua në spektakël publik pa lejen e tij:
“E konsideroj shumë shqetësues faktin që një moment privat u bë publik pa pëlqimin tim. Kam respekt për artistët, por shpresoj të reflektojmë të gjithë mbi ndikimin që ka kur jeta e dikujt tjetër kthehet në spektakël publik.”
Sakaq, rrjetet sociale vijojnë të shpërndajnë videon, ndërsa reagimi i Chris Martin mbetet ende i pakomentuar nga grupi Coldplay.
