Ditën e djeshme i gjithë opinioni publik u trondit nga një tragjedi e madhe që ndodhi në mes të ditës, në mes të Tiranës. Një ish-bashkëshort i mori jetën me dy plumba, nënës së dy fëmijëve të tij. Fadil Kasemi 53-vjeç ekzekutoi ish-gruan, gjyqtaren Fildes Hafizi 38-vjeçare. Lidhur me këtë ngjarje të rëndë pati një reagim të jashtezakonshëm nga familjarët, miqtë, qytetarët e thjeshtë e deri tek krerët e shtetit. Të gjithë dënuan aktin ndërsa sot viktima u përcoll për në banesën e fundit. Në lëmin e reagimeve ne veçuam atë të juristes më të famshme shqiptare, drejtueses së rubrikës “Shihemi në gjyq”, Eni Çobani. Përmes një deklarate në rrjetet sociale, zonja Eni shprehet se në këtë rast, burgu për vrasësin është pak.
STATUSI I PLOTE
Të jesh grua në këtë vend duhet të jesh e fortë, trimëreshë, duhet të kalosh dhe forcën e burrit që t’i bësh ballë jetës.Nuk flisja dot dje nga dhimbja që ndjeva por sot fjalët më dalin plot mllef dhe revoltë për atë burrë të paburrë që ngre dorën e shkrep armën për t’i marrë jetën një gruaje, një nëne, një vajze, nëne duke lënë pas dy femijë me lot në sy dhe me zemër të vrarë.Ti more mashkull i paburrë nuk vrave vetëm nje grua por vrave së pari dy fëmijët e tu duke i lënë pa nënë. Për ty dhe për ca si ty burgu është pak se unë nuk mund ta mendoj dot të jetosh ti me taksat tona dhe të vdesë ajo që i shërbente këtij vendi. Fjalët janë pak por duhet që ky vend të reagojë dhe ne si nëna na del një detyrë e madhe që djemtë tanë përpara se t’i shkollojmë në shkollat më të mira të botës, t’i edukojmë për t’i bërë njerëz të mirë dhe qytetarë të denjë. Të qoftë dheu i lehte mikja ime dhe fëmijëve të tu i ke lënë pasuri emrin tënd të mirë e plot dashuri./ revistawho.com
