Ajo nisi si një përpjekje për t’u bërë pjesë e një sfide virale, por për influencuesen e njohur Mariana Vasiuc përfundoi me një dëmtim serioz në shpinë.
Në një video të postuar në “Instagram”, Vasiuc shihet teksa mundohet të realizojë një nga trendet më të bujshëm të momentit, të frymëzuar nga Nicki Minaj. Me një palë stileto në këmbë dhe një enë formule për foshnje vendosur mbi një tenxhere, ajo përpiqet të ruajë ekuilibrin mbi një banak kuzhine, ndërkohë që dikush e mban për dore për ta ndihmuar.
Por gjithçka shkon keq në momentin që ajo lirohet nga mbështetja: enët rrëshqasin dhe influencuesja përfundon duke rënë nga banaku, duke pësuar një dëmtim të dukshëm.
“Ironia? Karma? Apo thjesht jeta, e cila gjithmonë na vë në provë forcën në momentin më të papritur. ”, shkroi ajo në përshkrimin e videos, duke i shtuar një dozë humori situatës që mund të kishte përfunduar edhe më keq.
Ngjarja është bërë virale dhe ka hapur debat mes ndjekësve për rreziqet që fshehin trendet e rrezikshme të rrjeteve sociale, ku shpesh kufiri mes argëtimit dhe rrezikut fshihet lehtë.
