Një video e shkurtër me Kanye West, e regjistruar gjatë një vizite të tij në Japoni, është bërë virale pasi një moment i papritur ka habitur ndjekësit. Klipi u publikua në TikTok nga krijuesi i përmbajtjes “Mystery Fashionist”, i cili ka afro 300 mijë ndjekës dhe njihet për intervista të shpejta rruge me personazhe të ndryshëm.
Në video, Kanye paraqitet i qetë dhe me humor, duke e prezantuar veten si “Ye nga Chi”. Ai tregon se çdo kombinim që bën e vlerëson “10/10” dhe se atë ditë po mbante një palë Yeezy 950, ndërsa pjesën tjetër të veshjeve i kishte blerë rastësisht në një dyqan të vogël aty pranë. Intervista dukej se po shkonte drejt një momenti tipik argëtues, derisa intervistuesi i bëri pyetjen: “Cilin trend mode do të doje të mos e kishe ndjekur?”
Në atë çast, Kanye ndaloi, vështroi kamerën për disa sekonda dhe u përgjigj vetëm me një fjalë: “Jeta.”
Kjo deklaratë e shkurtër, por e ngarkuar emocionalisht, u shpërnda gjerësisht dhe ngjalli diskutime të shumta në komente. Shumë përdorues interpretuan reagimin e tij si një shenjë e lodhjes dhe presionit që ai ka përjetuar kohët e fundit, mes çështjeve ligjore, konflikteve personale dhe debateve të vazhdueshme publike.
