Mbrëmë në ekranin e “Top Channel” nisi programi i shumëpritur “Dua të të bëj të lumtur” drejtuar nga Arbana Osmani. Sigurisht që kurioziteti ishte i madh e prej kohësh shqiptarët mezi prisnin ta shikonin këtë program, aq më tepër kur prezantuesja e tij kishte ofruar copëza nga xhirimet prej muajsh. Dhe siç pritej, spektakli kapi majat e audiencës dhe ishte më i komentuari në rrjetet sociale. Kjo falë historive prekëse që u trajtuan në të. Dy histori suksesi e një e tretë që u mbyll me dhimbje e refuzim, bënë që shqiptarët të shpërthenin në komente, përfshirë edhe personazhe të njohur. Dy blogerët e famshëm Olti Curri dhe Fatma Haxhialiu komentuan me ndjekësit e tyre historitë.
HISTORITE
Të gjithë u prekën nga djali i vogël i cili fatkeqësisht ishte shpërfytyruar nga një incident në klasë, por fatmirësisht programi i “Top Channel” gjeti mjekët që do e marrin përsipër operacionin e tij. Por padyshim historia që bëri më shumë bujë, e po vazhdon të komentohet edhe sot, ishte ajo e refuzimit të një babai. Një vajzë e martuar me një djalë të komunitetit egjiptian, me të cilin tashmë ka edhe tri fëmijë, prej nëntë vitesh nuk shkelte më në shtëpinë e saj të lindjes. Mirëpo më shumë se sa historia, ajo që tronditi shqiptarët ishte reagimi i zotërisë kur gazetarja i tregoi mesazhin e vajzës dhe mbesës së tij. “Edhe ta shikoj duke vdekur, unë i ve shkelmin në fyt”, u shpreh ai. Kjo deklaratë shkaktoi tronditje të thellë jo vetëm tek vajza por tek i gjithë opinioni publik.
