Pas njoftimit për ndalimin e pjesëmarrjes së studentëve të huaj në Harvard dhe universitetet e ngjashme, e ardhmja akademike e princeshës Elisabeth, trashëgimtares së fronit belg, vihet në pikëpyetje. Vendimi i ri kërkon që studentët ndërkombëtarë të transferohen në universitete që ofrojnë mësim fizik, përndryshe rrezikojnë të humbasin statusin e tyre ligjor në SHBA.
Princesha 23-vjeçare ka përfunduar së fundmi vitin e parë të programit Master në Politika Publike në Harvard dhe ky zhvillim mund të ndikojë drejtpërdrejt në planet e saj akademike.
“Princesha Elisabeth sapo ka përfunduar vitin e saj të parë. Ndikimi i vendimit të administratës Trump do të bëhet më i qartë në vijim. Aktualisht po shqyrtojmë situatën”, u shpreh zëdhënësja e Pallatit Mbretëror, Lore Vandoore, për Reuters.
Edhe drejtori i komunikimit të Pallatit Mbretëror, Xavier Baert, konfirmoi se situata po analizohet dhe për momentin mbetet të shihet se si do të zhvillohen ngjarjet: “Po e analizojmë këtë, për momentin do i lëmë gjërat të rregullohen. Shumë gjëra mund të ndodhin në vijim.”
E diplomuar më parë në Universitetin e Oksfordit në Histori dhe Politikë, Princesha Elisabeth kishte zgjedhur të thellonte studimet në SHBA, në një degë që përputhet me rolin e saj të ardhshëm si monarke.
Ndërkohë, vetë universiteti “Harvard” ka reaguar kundër këtij vendimi të administratës Trump, duke e cilësuar si të paligjshëm dhe duke konfirmuar mbështetjen për studentët ndërkombëtarë që ndjekin studimet në këtë institucion prestigjioz.
E ardhmja e Princeshës në këtë universitet elitë mbetet pezull – një situatë që jo vetëm reflekton tensionin mes politikës amerikane dhe botës akademike, por edhe sjell në vëmendje ndikimin e saj në individë të profilit të lartë global.
