Presidenti amerikan Donald Trump ka nënshkruar një urdhër ekzekutiv që çon në mbylljen e disa agjencive të lajmeve të financuara nga qeveria amerikane, duke përfshirë “Zërin e Amerikës” dhe “Radio Evropa e Lirë”. Ky vendim prek mijëra punonjës dhe ngre shqetësime për ndikimin e tij në informacionin global.
Sipas Reuters, punonjësit e “Zërit të Amerikës” janë njoftuar me email se do të kalojnë në leje administrative me pagë dhe përfitime të plota deri në një njoftim të dytë. Ndërkohë, Agjencia Amerikane për Median Globale (USAGM), e cila mbikëqyr këto institucione, u ka ndaluar hyrjen në ambientet e punës dhe aksesin në sistemet e brendshme. Nuk dihet ende numri i saktë i punonjësve të prekur nga ky vendim.
Urdhri ekzekutiv parashikon shkurtime drastike të stafit në gjashtë agjenci mediatike, përfshirë Radio Azia e Lirë, Zyrën e Kubës (Radio Marti), Rrjetin e Transmetuesit për Lindjen e Mesme dhe Fondin e Teknologjisë së Hapur. Më shumë se 1000 punonjës të “Zërit të Amerikës” dhe Zyrës për Transmetimin e Kubës janë prekur nga kjo masë.
Gazetari shqiptar i “Zërit të Amerikës”, Elez Biberaj, e ka komentuar këtë zhvillim si një humbje të madhe për demokracinë dhe lirinë e medias, duke e quajtur “një kapitull të trishtuar në historinë e angazhimit të Amerikës me botën”. Ai theksoi se “Zëri i Amerikës” ka qenë për dekada një burim i besueshëm informacioni për rajone të privuara nga liria e shtypit dhe një mbështetës i vlerave demokratike.
