Turjan Hyska ka qenë një ndër emrat më të diskutuar për lëvizjet e fundit në televizione. Pak kohë më parë u tha se ai do të linte ‘Vizon Plus’ për një tjetër televizion. Pas një heshtje të gjatë por edhe mohimeve të herë pas hershme, erdhi koha që Turi ta pranojë se do të largohet përfundimisht nga ‘Vizon Plus’. Me anë të një statusi të gjatë në rrjetin social ‘Facebook’ ai ka treguar si qëndron e vërteta dhe ka falënderuar të gjithë stafin e televizionit që e bëri të njohur. “Pas 14 vitesh dhe më shumë se 13 programe të realizuar, sezoni i ri televiziv nuk do të më gjejë më në Vizon Plus! Një vendim i vështirë, por i pakthyeshëm, i ardhur natyrshëm pas një eksperience që mund ta quaj fantastike në tërësinë e saj!”, – ka shkruar ai.
Më tej ai ka treguar se në fakt nuk do të heq dorë përfundimisht nga televizioni, sepse shumë shpejt ndoshta mund të vijë me një projekt të ri, por nën një logo tjetër. “Publik i dashur që më keni parë çerr në ekran dhe tashmë plot 33 vjeç, kam vetëm një mesazh: ‘Taksirat do më duroni dhe ca! Do bëni ç’do bëni, kemi netë të gjata përpara!’ Mos harroni, fantazia është pasuria më e madhe që kemi”, – ka mbyllur në këtë mënyrë Turi shkrimin e tij. Ndërsa disa burime të ‘Anabel’ thonë se Turi do të fillojë shumë shpejt punë së bashku me stafin e ‘Apartamenti 2XL’ në televizionin ‘Klan’. /revistawho.com
