Pas një procesi të zgjatur dhe një akuze që tronditi opinionin publik, Gjykata Themelore e Prishtinës ka shpallur të pafajshëm reperin Asdren Gjikolli, i njohur si Gjiko. Akuza, që daton disa vite më parë, lidhej me një rast të dyshuar abuzimi seksual ndaj një vajze 15-vjeçare.
Trupi gjykues arriti në përfundimin se provat e paraqitura nga prokuroria nuk ishin të mjaftueshme për të vërtetuar lidhjen e artistit me ngjarjen. Si rrjedhojë, Gjiko u lirua nga të gjitha akuzat.
Ky rast u bë publik për herë të parë në mars të vitit 2022, kur disa media raportuan se reperi ishte nën hetim për një ngjarje të rëndë. Sipas padisë së atëhershme, ai dyshohej se kishte joshur një vajzë të mitur me premtime për karrierë në muzikë, duke përdorur më pas substanca narkotike për të kryer marrëdhënie seksuale me të.
Pretendimet ndezën menjëherë rrjetet sociale dhe shkaktuan reagime të ashpra nga publiku, duke vënë në pikëpyetje figurën publike të reperit. Por Gjiko reagoi menjëherë përmes një deklarate në rrjete sociale, ku i mohoi me vendosmëri të gjitha akuzat:
“Të nderuar familjarë dhe miq,
Gjatë këtyre ditëve, unë dhe familja ime jemi duke u përballur me një të pavërtetë të sajuar. Unë nuk kam dhunuar askënd, e lëre me një 15-vjeçare. Nuk kam mashtruar dhe as nuk kam premtuar karrierë, e as nuk i kam dhënë një të miture substanca narkotike. Familja ime është shumë në rregull sepse e dinë që kjo gjë është e sajuar.”
Ai gjithashtu bëri të ditur se kishte nisur veprime ligjore për shpifje dhe u shpreh i bindur në drejtësinë e institucioneve.
Vendimi për ta shpallur të pafajshëm mbyll një kapitull të gjatë e të zhurmshëm për reperin, i cili për shumë kohë u përball me gjykim publik përpara se të përballej me gjykimin ligjor.
