Para pak kohësh, qarkulluan aludime se aktori i njohur Arben Derhemi kishte përfunduar martesën e tij disa vjeçare me gazetaren dhe psikologen, Iva Korumi, për shkak të një tradhtie nga ana e tij.
Çifti, që janë prindër të një vajze të quajtur Darlin, e cila erdhi në jetë në vitin 2009, u vu nën vëmendjen e madhe të publikut nga ky thashethem.
Arbeni, më në fund, ka vendosur të flasë për të sqaruar të vërtetën. Në një intervistë të fundit, ai zbuloi se ndarja nga ish-bashkëshortja ka ndodhur dy vite më parë dhe se atëherë vendosën ta mbajnë larg mediave.
“Është e gjitha një gënjeshtër e madhe sepse unë kam kohë që jam ndarë, kam gati dy vjet e gjysmë. Nuk e kuptoj, e gjitha ishte si me urdhër, e gjitha ishte e makinuar nga një makineri e çuditshme thashethemi, maskarallëku që nuk më bën shumë përshtypje sepse kam dëgjuar shumë gjëra për miq, shokë të mitë të cilët i njoh shumë mirë, i di shumë mirë,” – tha Arbeni.
Më tej, ai shtoi: “Por këtë radhë ishte shumë e çuditshme sepse e kam mbajtur larg jetën time private, larg televizionit, larg revistave, larg gjithçkaje sepse është e imja dhe e atyre që kanë qenë rreth meje. U vendos një moment që ne të ndahemi dhe kaq, s’ka asgjë të çuditshme!”
