Fero ka reaguar pas kritikave të shumta që ka marrë për rikthimin e tij në muzikë. Si fillim reperi ka shprehur zhgënjimin ndaj sistemit gjyqësor në Kosovë pasi prej muajsh nuk ka takuar vajzën e tij, për të cilën thotë se do ta dëgjojë muzikën e tij dhe do kuptojë kush kishte të drejtë.
Fero sqaron se nuk i detyrohet askujt llogari për zgjedhjet e tij personale, duke shtuar se vendimet e tij janë në përputhje me besimin që ai ndjek.
“Kam bërë shumë përpjekje… vetëm prindërit që kanë kaluar në këtë fazë e kuptojnë dhimbjen dhe sa i pafuqishëm ndjehesh kur nuk mundësohet asnjë formë kontakti me fëmijën tënd,” shkruan ai në pjesën e parë.
Fero kritikon gjykatat që sipas tij “kanë dështuar të marrin masa ndaj shkeljeve të vendimeve të tyre” dhe shprehet se drejtësia në Kosovë “funksionon vetëm për ata që kanë para”. Ai bën të ditur se tani është përfaqësuar nga avokatja Bedrije Rexhepi, ndërsa akuzon edhe ndikimin politik, duke përmendur “motrën e presidentes” si pjesë të palës tjetër në procesin ligjor, të cilën e quan faktor në shtrembërimin e drejtësisë në këtë çështje.
“Unë asnjëherë nuk do të lejoj që vajza ime të rritet pa praninë time,” thekson Fero.
Në pjesën e tretë, Fero ndalet tek rikthimi i tij në muzikë duke u shprehur: “Unë e kuptoj shumë mirë se çfarë është e ndaluar dhe e lejuar në besimin tim,” duke theksuar se përgjegjësinë e ka vetëm para Krijuesit të tij.
“Të gjithë ne jemi të gabueshëm, ndërsa i pagabueshëm dhe i përsosur është vetëm Zoti i Lartësuar,” përmbyll Fero reagimin.
