Reperi Skivi fillimet e karrierës së tij i ka pasur së bashku me Ledri Vulën në grupin ‘Skillz”. Dyshja sollën shumë bashkëpunime të suksesshme, të cilat i bënë shumë të njohur për publikun shqiptar. Pas shkëputjes reperët vazhduan karrierën solo dhe rreth një vit më parë Skivi u largua edhe nga labeli i “Babastars”. Por duket se pavarësisht shkëputjes nëse prisnit që ai dhe anëtarët e tjerë të labelit të kishin marrëdhënie të këqija, Skivi tregon të kundërtën.
Në një intervistë për “Mirage” reperi u shpreh se pavarësisht se nuk shihen shpesh bashkë, ata vazhdojnë të kenë ende marrëdhënie të mira.
“Edhe pse me ndonjërin prej tyre nuk na bie rasti të shfaqim prezencën tonë në rrjetet sociale, kjo nuk do të thotë që ne nuk rrimë bashkë apo nuk kemi marrëdhënie të mira. Gjithçka është duke u konsoliduar dhe në fund shpresoj të ketë rezultate të mira”,- tregoi Skivi.
I pyetur nëse dëshiron që grupi “Skillz” të kthehet sërish, ai tregoi se do të kishte shumë dëshirë.
