Dashuria, sakrificat dhe vështirësitë ishin në qëndër të historisë së fundit që mbylli puntatën e sotme të programit “Dua të të bëj të lumtur”. Kjo ishte historia e Vladimirit dhe Shpresës, çiftit nga Tropoja të cilët rrëfyen se dashuria që kishin për njëri-tjetrin i kishte tejkaluar të gjitha sfidat që jeta kishte rezervuar për ta. Vladimiri dhe Shpresa ishin dashuruar me shikim të parë dhe më pas kishin emigruar për në Itali.
Vite më vonë Vladimiri pëson një aksident në punë dhe qëndron në koma për një kohë të gjatë. Shpresa i kishte qëndruar pranë dhe i kishte dhënë kurajo për ta vlerësuar jetën dhe për të ecur përsëri. Në momentin që ata kishin rigjetur qetësinë dhe lumturinë, Shpresa diagnostikohet me tumor në gjuhë. Edhe këtë herë kishte qenë Shpresa, ajo që i kishte dhënë forcë dhe kurajo atij.
Në programin “Dua të të bëj të lumtur”, Vladimiri e falenderoi Shpresën për çdo moment që i kishte qëndruar pranë dhe i premtoi që do të jenë bashkë deri në fund të jetës.
Surpriza që programi “Dua të të bëj të lumtur” kishte rezervuar për Shpresën ishte këngëtarja e suksesshme dhe e dashur për publikun, Soni Malaj, e cila u shpreh: “Së fundmi unë kam bërë një këngë për Femrat, që janë pikërisht si Shpresa. Kjo këngë i dedikohet femrave si ty. Ju jeni çifti që na treguat se në familjet shqiptare ka shpresë. Ju jeni një shembull perfekt për fëmijët tuaj!”
