Largimi i papritur i Enxhi Nasufit nga programi i mëngjesit në Top Channel u kthye menjëherë në një nga temat më të diskutuara të showbiz-it shqiptar, i shoqëruar me aludime për një përplasje fizike me ish-kolegen Neada Muça. Pas një periudhe heshtjeje, moderatorja vendosi të flasë publikisht, duke e zhvendosur vëmendjen nga thashethemet drejt versionit të saj personal.
Gjatë një interviste, Nasufi mohoi kategorikisht pretendimet për dhunë dhe reagoi drejtpërdrejt ndaj lajmeve që qarkulluan:
“E vërteta është kjo: në punë ka konflikte, debate. Konfrontime fizike? Kurrë. U mërzita në fillim kur lexova këtë gjë, është e shëmtuar. Nuk e doja këtë lloj vëmendjeje.” Një deklaratë që synon të qetësojë situatën por që njëkohësisht konfirmon se raportet mes ish-kolegeve kanë kaluar një periudhë të tensionuar.
Pyetjes nëse sot komunikon me Neadën, përgjigjja e saj ishte e prerë: “Jo.” Qëndrimi u shoqërua me një reflektim mbi mënyrën si duhet të trajtohen mosmarrëveshjet në publik:
“Për një arsye shumë të thjeshtë: unë i vlerësoj shumë njerëzit kur ulen me këmbë në tokë, të vijnë përballë e të komunikojnë me transparencë.” Mesazhi i saj, më shumë sesa një sqarim, tingëllon si një kufi i ri profesional dhe personal.
