I ftuar në studion e emisionit “Ndryshe”, me Elona Duron dhe Salsano Rrapin në Top Albania Radio, Yll Limani ka ardhur me një rrëfim të hapur dhe pa filtra. Përveç projekteve muzikore dhe albumit të ri, artisti ndau edhe detaje personale, duke u ndalur te disa gjëra që, sipas tij, publiku në Shqipëri ende nuk i di siç duhet.
Që në nisje të bisedës, këngëtari theksoi një detaj të vogël në dukje, por që për të ka rëndësi: emri i tij. Yll Limani tregoi se prej vitesh prezantohet gabim në evente, media dhe dalje publike, duke sqaruar më në fund se si është në të vërtetë emri i tij.
“Emrin Ylli nuk ma kanë vendosur kurrë. Unë e kam Yll, vetëm Yll pa ‘i’. Gjithmonë në Shqipëri e thoni Ylli Limani. Gjithë kohën më keni prezantuar gabim. Edhe kur shkoj në ndonjë event e shikoj nga pas aty Ylli Limani dhe them gjithmonë është Yll pa ‘i’.”
Më tej, gjatë intervistës, Ylli u pyet se çfarë mendon se e bën të veçantë në raport me artistët e tjerë të skenës shqiptare. Pa pretendime dhe me shumë modesti, ai foli për lidhjen që publiku ka krijuar mes muzikës së tij dhe një atmosfere të caktuar emocionale.
“Nuk e di, kam qenë gjithmonë ndoshta më specifik. Të gjithë njërëzit në stinën e vjeshtës dhe të shiut, të ftohtit e kanë lidhur me Yllin, me këngët e mia, me albumin. Nuk di të flas për vetën në kuptimin e mirë të fjalës. Ndoshta tekstet, ndoshta ngjyra e zërit që është meritë e Zotit nuk është e imja. Unë vetëm kam ditur ta përdor mendoj. Është meritë edhe e prindërve të mi.”
