Pas deklaratave të bujshme të bëra në emisionin “Shqipëria Live”, ku babai i Selinës, Jeton Bollati, e etiketoi Mirin me fjalë të rënda si “mashkull pervers” dhe “zhigolo”, situata ka marrë një tjetër kthesë.
Ndërsa komentet kanë shpërthyer në rrjete sociale dhe emri i këngëtarit është vënë në qendër të vëmendjes, familjarë, miq dhe figura të afërta me të kanë reaguar publikisht për të sqaruar se kush është Miri jashtë asaj që shihet në ekran.
Në mesin e tyre, një nga zërat më të fortë ka qenë ai i Kaltrinës, vajzës së këngëtarit të ndjerë Dr. Flori. Përmes një postimi në “Instastory”, ajo ka zgjedhur të thyejë heshtjen dhe të flasë hapur për karakterin e Mirin, duke kundërshtuar akuzat që po qarkullojnë.
Reagimi i Kaltrinës:
“Si një e afërme dhe ndjekëse e rregullt e Big Brother, mendoj se shumë njerëz po harrojnë thelbin e këtij formati dhe mënyrën se si situatat brenda tij mund të perceptohen gabim nga jashtë.
Miri është ai person që di të dëgjojë, të ndihmojë dhe të qëndrojë pranë kur ka nevojë. Asnjëherë nuk është cenuar privatësia e askujt dhe nuk ka ndodhur kurrë që Miri të kalojë limite, sepse është një burrë me parime, me kufij të qartë dhe gjithmonë xhentil në sjelljen e tij.
Është e rëndësishme të mos harrojmë se gjuha e urrejtjes dhe përpjekjet për të thyer imazhin e dikujt nuk dëmtojnë vetëm personin në fjalë, por prekin drejtpërdrejtë edhe familjen dhe njerëzit e tij më të afërt.”
Duket se për Mirin, përkrahja nga njerëzit e afërt vazhdon të jetë e fortë, edhe në një nga momentet më të komentuara të këtij sezoni.
