Historia e një gruaje që ishte dhunuar prej 17 vitesh nga ish-bashkëshorti i saj mbylli puntatën e sotme të programit “Dua të të bëj të lumtur”. Kjo ishte historia e trishtë e Valbonës e cila ishte ftuar nga vajza e saj me aftësi të veçanta, Llambrinia. Valbona ishte martuar me shkuesi dhe gjatë gjithë kohës kishte pasur probleme me familjen e ish-bashkëshortit. Fatkeqësisht gjatë kohës që ishte shtatzënë, Valbona e kishte humbur fëmijën e parë dhe ish-bashkëshorti e kishte bërë atë fajtore. Pas disa vitesh në jetë kishte ardhur Llambrinia, por ajo kishte lindur me aftësi të veçanta dhe përsëri ish-bashkëshorti vazhdonte ta akuzonte Valbonën. Për këtë arsye ai ushtronte dhunë fizike mbi të dhe Llambrininë, pasi ai nuk e konsideronte si vajzën e tij. Kësaj dhune nuk i kishte shpëtuar as vajza e vogël e çiftit. E lodhur nga dhuna e vazhdueshme për 17 vite me rradhë Valbona kishte vendosur që të divorcohej. Llambrinia i ishte drejtuar programit “Dua të të bëj të lumtur” për të falenderuar mamanë e saj që nuk e braktisi dhe për ta falenderuar për çdo sakrificë që ka bërë dhe vazhdon të bëjë për të. “Mami kam ardhur këtu për të të bërë të lumtur dhe që t’i harrosh vuajtet që ke kaluar me mua dhe babin tim që të dhunonte. Të faleminderit për çdo gjë që ke bërë për mua dhe që nuk më braktise këto 17 vite duke sakrifikuar veten tënde. Ti dhe motra jeni gjithçka për mua!” ,- ishin fjalët e Llambrinisë. Në studio Valbona rrëfeu vështirësitë ekonomike dhe sakrificat që duhej të bënte çdo ditë për të rritur e vetme dy vajzat e saj. Gjithashtu ajo tha: “Deri sa të kem jetë nuk do t’ju lë kurrë, as ty as motrën tënde. Ju jeni gjithçka për mua!” E ftuar surprizë për Valbonën ishte këngëtarja tepër e dashur për publikun, Maja e cila i dha këtë mesazh: “Në këto kushte që kemi duhet të mundohemi të gjejmë momente të bukura në jetën tonë. Le të rrëmbejmë çdo gjë të bukur dhe ti ke adhurimin tim sepse je një femër tepër e fortë. Të gjithë kanë probleme, por me forcën tonë të brendshme ne ja dalim!”./revistawho.com
