“Bashkia Tiranë” ka nisur një nismë të quajtur “Operacioni Kutia” sipas së cilës çdo fëmijë mund të dhurojë gjithçka që dëshiron për bashkëmoshatarët e prekur nga tërmeti në Durrës, Thumanë, Laç dhe Krujë. Shumë fëmijë të Tiranës i janë bashkuar kësaj nisme dhe kanë dhuruar lodra e çfarë kanë pasur mundësi për të tjerët. Pjesë e “Operacionit Kutia” janë bërë edhe fëmijët e Valbona Selimllarit, vajza, Vivien dhe djali i vogël, Kejn. Valbona ka publikuar në “Instagram” një video në të cilën shihet se ajo së bashku me fëmijët kanë mbushur disa kuti me lodra dhe veshje të ndryshme për fëmijët që janë prekur më shumë nga tërmeti. Nga videoja e publikuar duket se ata të tre e kanë shijuar shumë këtë proces dhe shihen shumë të kënaqur. “Vivien dhe Kejni ju bashkuan nismës ‘Operacioni Kutia’ në ndihmë të moshatarëve të prekur nga tërmeti”, ka shkruar Selimllari përkrah videos.
https://www.instagram.com/p/B6QZpyygfhu/?igshid=d4396vjk2zjr
Ky është një shembull shumë i mirë nga Valbona, duke qenë se fëmijët duhet të mësohen që në një moshë shumë të vogël me frymën e humanizmit. /revistawho.com
