Valton Krasniqi: Do hedh në gjyq David Guetta-n, më vodhi këngën

Shpesh emra të muzikës shqiptare janë akuzuar se kanë “vjedhur” këngë nga artistët e huaj, por kësaj here ndodhi e kundërta. Muzikanti Valton Krasniqi në një intervistë për “Bluetooth” ka akuzuar një nga emrat më të njohur të muzikës botërore David Guetta se i ka vjedhur këngën. Krasniqi ka shkuar edhe më tej duke kërcënuar se do e hedhë në gjyq Guetta-n. Ai thotë se kënga e fundit e Guetta-s, e realizuar në bashkëpunim me Nicki Minaj, Bebe Rexha dhe Afrojack, “Hey Mama”, nuk është asgjë më shumë sesa një kopje e refrenit të një kënge që ai ka publikuar në vitin 2005 me titull “Lei Lei (Mos më provoko)”. Ky projekt i muzikantit shqiptar gjatë asaj kohe është transmetuar edhe në “MTV & VIVA”, duke u bërë kështu një këngë mjaft e pëlqyer dhe e
dëgjuar ndërkombëtarisht. Sa i takon çështjes me Guetta-n, Valton Krasniqi shprehet se ka ndërmend të nisë procedurat ligjore dhe ka kontaktuar “Production Sony BMG” për këtë. Ndërsa Krasniqi pret që të konfirmohen dyshimet e tij, kënga me titull “Hey Mama” grumbullon miliona fitime të ardhura nga shitja e saj.