Vdes minatori në Bulqizë, reagon Arbana Osmani: Atje isha para një jave, nga nëntoka vijnë histori të jashtëzakonshme

Një minator ka gjetur vdekjen ditën e sotme në Bulqizë. Nga të dhënat e para u bë e ditur, se 31-vjeçari ka qenë duke punuar në zonën D të një miniere, ndërsa e ka zënë poshtë një masiv gurësh. Sot rreth orës 09:15, policia u njoftua se ishte dërguar në spitalin Bulqizës, një shtetas pa shenja jete, punëtor në minierën e kromit. Shërbimet e policisë dhe grupi hetimor shkuan në ambjentet e spitalit dhe në vendin e ngjarjes, ku kanë konstatuar se në ambjentet e brendshme të një galerie kromi, në zonën D, shtetasi E.K, 30 vjeç, banues në Bulqizë (punëtor në galeri), duke punuar dyshohet se e ka zënë poshtë një masiv gurësh i shembur e pasojë ka humbur jetën.
Pak orë pas publikimit të këtij lajmi të trishtë, ka reaguar prezantuesja e suksesshme Arbana Osmani. Ajo është prekur shumë nga ngjarja sepse vetëm pak ditë më parë, ishte shumë pranë punonjësve në minierat shqiptare. Me kamerën e “Top Channel” ajo shkoi për të xhiruar këtë realitet të vështirë njerëzor, historia e të cilit do të shfaqet së shpejti në programin “Dua të të bëj të lumtur” që drejtohet nga Osmani edhe këtë sezon të dytë.
“Një javë më parë së bashku me Eduart Grishaj dhe Lorina Mixhën xhiruam për “Dua të të bëj të lumtur” 1100 m nën tokë në Minierën e Bulqizës, aty ku sot ka humbur jetën një minator 31-vjeçar nga një masiv gurësh. Duke i dërguar ngushëllimet më të sinqerta familjes, mezi presim t’ju tregojmë këtë sezon historitë më të jashtëzakonshme që vijnë edhe nga nëntoka”, ka shkruar Arbana./ revistawho.com