Skulptori dhe argjendari Silvio Gazzaniga, krijuesi i shumë trofeve në botën e sportit, më i famshmi prej tyre “Kupa e Botës”, ka vdekur në banesën e tij në Milano të Italisë.
“U shua paqësisht në gjumë në shtëpinë e tij. Dje në darkë shkoi për të fjetur dhe sot në mëngjes e kuptuam që nuk merrte më frymë”, tha djali i tij Giorgio.
I lindur në Milano, Silvio Gazzaniga mbushi 95-vjeç më 23 janar.
Ai u formua si skulptor në shkollat e artit në Milano në vitet ’40.
Viti që ndryshoi jetën e tij ishte 1970, ku pas fitores së botërorit të Meksikës, Brazilit iu dha në mënyrë të përhershme trofeu i Kupës së Botës.
Pas kësaj, FIFA shpalli një konkurs për gjithë artistët e botës për të realizuar një trofe të ri, dhe mes 53 alternativash të prezantuara, fituese doli ajo e Silvio Gazzaniga-s.
Kupa e re, ka shpjeguar vetë artisti, përfaqëson gëzimin, lumturinë dhe madhështinë e atletit në momentin e triumfit: Dy futbollistë të stiluar, që të lumtur, mbajnë gjithë botën në duar.
