Ditën e sotme aktorja e njohur e “Al Pazar”, Xheni Hallulli ishte e ftuar speciale në emisionin “Rreze Dielli” në “Report TV”. Si rrallëherë Xheni ka rrëfyer detaje mbi jetën e saj dhe histori që nuk i kishim dëgjuar më parë. Gjatë emisionit aktorja është emocionuar nga një surprizë e përgatitur nga drejtuesit e emisionit, Suada Daci dhe Alban Musa. Vëllai i Xhenit, Edi Hallulli, luajti me violinë një pjesë të muzikës që këndonte babai i tyre i ndjerë. Menjëherë pas videos Xheni u përlot, duke treguar se kënga është shumë emocionuese për ta.
Aktorja rrëfeu se ka qenë 14 vjeçe kur babai i saj ka ndërruar jetë dhe se familja ka kaluar shumë vështirësi pas humbjes së tij. “E vështirë ishte më shumë për mamin tim se sa për mua se unë kam qënë në një moshë që e kaloja. Mami kishte një barrë shumë të madhe se vëllain e kisha në Austri. Babai im ka qenë ndër të vetmit që nuk u ka lëvizur një presje teksteve të këngëve tiranse, nuk u ka lëvizur një notë, plus që të mos e lavdëroj unë dhe zërin e ka pasur vërtetë shumë të bukur. Mua zakonisht kur më shohin në rrugë më thonë Kasem, ka qenë një tip i lezetshmëm edhe pse tironsit janë pak të rëndë”, ka treguar aktorja. Ndër të tjera ajo ka thënë se sensin e humorit e ka trashëguar prej të atit, madje edhe pasionin për motorrat. Kujtojmë se Xheni Hallulli u bë e njohur nga rolet e saj në “Portokalli” dhe prej vitit 2015 vazhdon karrierën si aktore në spektaklin e humorit “Al Pazar”. /revistawho.com
