Arsen Venger mendon se di gjithçka rreth Bazelit, kundërshtarit të radhës të Arsenalit në Ligën e Kampioneve. Ai ka informacione të mirëfillta pasi e ka parë këtë skuadër të mposhte Çelsin dhe Mançester Junajtid në vitet e kaluara, por sidomos sepse ka në radhët e ekipit lojtarë si Mohamad Elneni dhe Granit Xhaka të cilët janë rritur në klubin zviceran.
Ky i fundit ka edhe vëllanë e tij të madh, Taulantin, në radhët e Bazelit dhe sigurisht që të dy kanë komunikuar vazhdimisht. Por trajneri francez i Arsenalit mendon se asnjë prej tyre nuk ka treguar plotësisht të vërtetën në këto biseda pasi dëshiron të fitojë duelin brenda familjes.
“Po, sigurisht që më kanë ndihmuar pak”, tha Venger në një intervistë të publikuar në faqen e internetit të klubit. ”Kjo edhe sepse Xhaka luan kundër Xhakës, praktikisht kjo është një çështje brenda familjes. Unë mendoj se ata dy mund t’i fshehin njëri-tjetrit disa të vërteta gjithashtu, por sigurisht që e njohim Bazelin mirë pasi blemë Elneni nga ata një vit më parë.
Kjo është skuadra e cila ka dominuar kampionatin zviceran prej disa vitesh dhe kanë pasur rezultate të shkëlqyera në Angli pasi i kanë mundur të gjithë, si Mançester Junajtid e Çelsin, ndërsa barazuan me Liverpulin. Ndaj kanë arritur rezultate të forta në Europë.
Ata janë një skuadër e mësuar të luajë në Ligën e Kampioneve. Nuk është ndonjë emër i ri apo fillestar në Ligën e Kampioneve, ndaj kanë shumë eksperiencë në këtë kompeticion. Kjo eksperiencë shtrihet në breza të ndryshëm dhe kjo është arsyeja pse nuk frikësohen. Unë nuk pres që ata të frikësohen. Nga ana tjetër, nuk kanë asgjë për të humbur. Kjo është gjithmonë e rrezikshme”, ishte komenti i Venger për këtë duel.
