Ditën e sotme djali i madh i David dhe Victoria Beckham, Brooklyn, feston ditëlindjen. Për të uruar ditëlindjen e tij, çifti i njohur janë bërë nostalgjikë dhe kanë kujtuar disa nga momentet më të bukura. David publikoi një foto të vjetër të tij dhe djalit gjatë kohës që ai luante për “Manchester United”.
“20 vite më parë ky djalosh i vogël erdhi në jetët tona. Ne nuk mund të jemi më krenar se kaq për njeriun që është bërë dhe pasionin që ka për çdo gjë që bën… Të duam Bust, gëzuar ditëlindjen”, – ka shkruar David bashkangjitur një fotoje. Gjithashtu ai ka kujtuar ditën kur fitoi kundër Inter Milan në “Champions League” dhe kur Brooklyn erdhi në jetë.
Ndërsa Victoria në një foto të vjetër është shprehur shumë krenare për djalin e saj dhe ka treguar sa e lumtur ndjehet për prezencën e tij në jetën e tyre. 20-vjeçari u shprehu publikisht dashurinë prindërve të tij, kurse ditëlindjen vendosi ta festonte me partneren, modelen Hana Cross. /revistawho.com
