Starti i tyre është i njëjtë, sepse si Elvana Gjata, ashtu dhe Samanta Karavella, e provuan veten si këngëtare në spektaklin “Ethet e së premtes mbrëma”, shumë vite më parë. Edhe pse Elvana njihet për karrierë të shkëlqyer prej vitesh, duket se është radha e Samantës tani për të njohur shkëlqimin e saj. Në peshoren e suksesit i ka vendosur vetë publiku me klikimet që u ka dhënë respektivisht secilës në klipet e tyre të reja, që i kanë publikuar në kohë të njëjtë. Pavarësisht fansave dhe ndjekësve që numërojnë në rrjetet sociale, këtë verë ka arritur të bëjë më shumë prej tyre pë vete Samanta, si çift me reperin nga Kosova, Gent Fatali. Elvana solli më 1 korrik këngën e saj “Njësoj”, pas një periudhe 1-vjeçare shkëputjeje, ndërsa Samanta hodhi në treg më 2 korrik bashkëpunimin e parë me reperin, duke u komentuar si çifti më i ri i showbizz-it. Por “Na e dina” e Karavellës, e cilësuar si “vajza e mirë” e muzikës shqiptare, edhe pse u publikua një ditë me vonesë nga “Njësoj” i Elvanës, e lë pas atë me 500 mijë klikime më shumë. Të dyja këngëtaret kanë kaluar shifrën e dy milionë klikimeve për afër 2 javë, por hiti i Samantës ka rezultuar më i suksesshëm se i Elvanës. Sa u takon fabulave të këngëve, Samanta vjen me një flirt të bukur dashurie me Gent Fatalin, ndërsa Gjata i këndon e vetme dashurisë së komplikuar, që mbetet po njësoj./ Panorama
