Apartamenti në katin e dytë të një pallati në zonën e Unazës së Re, është shkrumbuar këtë të shtunë pasi u përfshi nga flakët e zjarrit që dyshohet se janë shkaktuar nga një karikues telefoni. Zjarri shpërtheu rreth orës 03:00 të mëngjesit të sotëm, duke vënë në panik tre vajzat që banonin në të dhe gjithë banorët e pallatit që dolën jashtë nga frika. Mësohet se njërës nga vajzat, i është dashur të kapërcejë nga ballkoni për t’i shpëtuar djegies. Ajo pësoi fraktura në këmbë gjatë hedhjes nga ballkoni i saj te ai i fqinjëve dhe u dërgua për mjekim në QSUT. Zjarri që ra në orët e mesnatës dyshohet të ketë ardhur si pasojë e harresës së një karikuesi telefoni në prizë, por ende vijojnë hetimet që do përcaktojnë edhe shkakun. Sic shihet edhe nga pamjet e siguruara nga “Shqiptarja.com”, flakët dhe tymi ishin aq të mëdha sa në vendngjarje shkuan 4 makina zjarrfikëse, të cilët bënë edhe evakuimin e të gjithë banorëve të pallatit. Për t’ju ardhur në ndihmë banorëve në vendngjarje shkuan edhe dy ambulanca, si dhe forcat e policisë.
679809 by revistaime
