Secili prej nesh e ka nga një personazh të botës së spektaklit që e pëlqen dhe bëhet kurioz për jetën e tij. Ne lexojmë çdo ditë lajme nga VIP-at, i ndjekim ato në rrjetet sociale, i komentojmë shpesh. E gjitha kjo prek një pjesë të realitetit tonë të përditshëm. Por të mos harrojmë që e njëjta gjë ndodh edhe për të vegjlit, vetëm se fëmijët i shohin yjet e skenës me sytë e pafajsisë. Por cilin duan më shumë ata? Çfarë u bën përshtypje syve të vegjël kur shohin artistët? Këtë e zbuluam më së miri gjatë një pasditeje me fëmijët e kursit kreativ “DIDIT”. Ajo që na bëri përshtypje menjëherë ishte pikërisht fakti se fëmijët i njihnin personazhet, madje ishin shumë të qartë për të preferuarin e tyre. Kësaj here fëmijët e kursit që zhvillohet 2 herë në javë në ambientet e qendrës “Concord” do të tregonin të gjithë kreativitetin e tyre, duke zgjedhur formën sipas fantazisë së secilit, për të na përshkruar njerëzit e famshëm. Pasi krijuan me shumë dëshirë punime me logon e “WHO”, fëmijët e “DIDIT” nisën të na shfaqin këndvështrimet e tyre për imazhin e personazheve publikë si Noizy, Elvana, Çiljeta… E teksa ne përqendrohemi tek kënga e re, apo zhvillimet e fundit nga jeta private e tyre, fëmijët shohin një anë krejt tjetër. Për shembull Elvanën donin ta bënin kuq e zi prej këngës, tek Noizy përveç buzëve i kishte rënë në sy edhe tatuazhi që ka reperi mbi krah (‘është e dashura e tij’, – ishte komenti i tyre), ndërsa Çiljetën e panë me gjoksin e madh dhe këmbët e gjata. Ndaj nuk duhet harruar se fëmijët shohin gjithçka, dhe kanë një mendim për çdo gjë. Ne thjesht duhet t’i krijojmë hapësirën e t’u japim vëmendjen që ata të shprehen.
Çfarë është “DIDIT Arts&Crafts”?
Kursi kreativ ndihmon të zhvilloni krijimtarinë e fëmijës suaj me synimin për të nxitur vetbesimin tek fëmijët, në krijimin e një ambienti stimulues që ngjall kënaqësi për të qenë pjesë e komunitetit artistik. Me materiale të riciklueshme, të lirë për të zhvilluar imagjinatën e tyre në krijimin e objekteve të ndryshme, orë kreative dhe zbavitëse, kërcim, këndim, kurse pikture.
Gjatë verës (nga 13 qeshori) për të gjithë fëmijët do të nisin kurset verore në të cilat do të përfshihen aktivitete craft-i, mësime të gjuhës angleze, kurse kërcimi, kurse aktrimi, zumba, yoga, guida në destinacione artistike, piknik në natyrë, etj.
