Japonia është vendi ku lindi pinguini i parë në botë me fekondim artificial. Ishte një sipërmarrje e vështirë që kërkoi 6 vite studime, por qëllimi i shkencëtarëve për zhvillimin e një teknologjie, që të ndihmojë në mbrojtjen e specieve të rrezikuara u arrit. Pinguini i lindur në këtë mënyrë është i shëndetshëm, e siç shihet në videon e siguruar nga “Reuters”, kujdestarja e peshon për të vënë re me kënaqësi se ka shtuar mirë në peshë, duke kapërcyer madje dhe pritshmëritë. Drejtuesit e akuariumit “Kaiyukan” të Osakës u lidhën për projektin e tyre me Kusunoki Hiroshi, profesor i asociuar i Universitetit të Kobes. Më vonë, përpjekjeve të tyre për të ndërhyrë në riprodhimin e specieve iu bashkua dhe Parku i Jetës Detare në Tokio. Ekipi i kërkuesve shpreson të ndihmojë në këtë mënyrë në shumimin e specieve të rrezikuara. Pinguini lindi në qershor dhe është mbajtur nën kontroll nga ekspertët që kanë parë ecurinë e shëndetit të tij. Sipas Organizatës ndërkombëtare për Mbrojtjen e Natyrës, disa lloje pinguinësh janë në rrezik sidomos nga ndryshimet e klimës. Një prej tyre, pinguini “perandor” mund të humbasë në dekadat e ardhshme 50% të popullatës. Në Antarktidë, disa koloni të kësaj specieje llogaritet të kenë humbur 2/3-tat e pjesëtarëve të tyre.
Dev by Techzero1.com