‘Who Likes Tirana’ është një projekt viziv i inicuar nga ‘Revista Who’ me qëllim promovimin e destinacioneve jo shumë popullore, për të konfirmuar resurset e panjohura turistike të Tiranës si dhe për të ofruar modele të turizmit lokal.
Kjo iniciativë merr një vëmendje dhe vlerë të veçantë pas tejkalimit të gjendjes së fatkeqësisë natyrore të shkaktuar prej pandemisë ‘Covid-19’. Stina e verës 2020 që mbërrin fill pas kufizmesh të shumta, duke i bërë udhëtimet jashtë vendit thuajse të pasigurta, ka nevojë për impulsin e një projekti të tillë.
“Who Likes Tirana” shihet si një mënyrë për të mbështetur turizmin dhe ekonomitë lokale pas mbylljes dhe vështirësive disa mujore.
Në ‘Who Likes Tirana’ do të udhëtojmë çdo javë nëpër destinacione të ndryshme rreth Tiranës. Seritë e ‘Youtube’ krijuar nga Eraldo Rexho do të sjellin çdo javë personazhet e njohur të ‘showbiz-it’ shqiptar, të cilët do të bëhen bashkë për të vizituar të gjitha destinacionet “must” të Tiranës dhe vendet rreth saj.
Ky videoprojekt do të sjellë për të gjithë ndjekësit humor, këngë dhe situata mjaft interesante teksa grupet e personazheve të njohur do të bëhen bashkë për të eksploruar çdo cep të kryeqytetit këtë verë. Ai do të realizohet përgjatë një periudhe 1-mujore, kohë kjo në të cilën do të vizitohen destinacionet e përzgjedhura si: Shpella e Pëllumbasit, Syri Ciklopit, Ujëvara e Shëngjergjit, Shpella e Valit, Maja e Shumresë, Shkëmbi Askola, Petrelë dhe Farkë.
Çdo episod do të ketë në fokus guidën turistike të destinacionit, aktivitete të ndryshme sportive dhe kulturore dhe kartolinat e personazheve publikë.
Ky projekt synon që me anë të promovimit të zonave me potencial turistik, kulinarisë, produkteve lokale, mundësisë për të pushuar ndryshe, promovimit të kulturës vendase si dhe aktivitetet e larmishme që mund të zhvillohen në secilin destinacion, do ta bëjnë Tiranën dhe destinacionet rreth tij një nga zonat më të vizituara për verën 2020.
Episodi i parë na fton në një udhëtim në Shëngjergj me pjesëmarrjen e: Irma Libohova, Delinda Disha, Visjan Ukcenaj, Lei Kraja, Keisi Shtëpani dhe Eraldo Rexho./revistawho.com
