Will Smith është tërhequr përfundimisht nga Akademia e Arteve dhe Shkencave të Filmit pas shuplakës që i dha Chris Rock në ceremoninë e ndarjes së çmimeve “Oscars 2022”.
Smith deklaroi dorëheqjen e tij në një prononcim të bërë ditën e premte për “Fox News”, ku u shpreh ndër të tjera se e ka tradhtuar besimin e Akademisë.
“Unë i jam përgjigjur drejtpërdrejt njoftimit të seancës disiplinore të Akademisë dhe do t’i pranoj plotësisht të gjitha pasojat për sjelljen time. Veprimet e mia në prezantimin e 94-të të çmimeve ‘Oscar’ ishin tronditëse, të dhimbshme dhe të pafalshme. Lista e atyre që kam lënduar është e gjatë dhe përfshin Chris, familjen e tij, shumë nga miqtë dhe më të dashurit e mi, të gjithë të pranishmit dhe audiencën globale në shtëpi. Unë e tradhtova besimin e Akademisë”, tha Smith ndër të tjera.
Smith shtoi se ai privoi të nominuarit dhe fituesit e tjerë nga shansi i tyre për të festuar dhe për këtë do të pranojë çdo pasojë të mëtejshme nga Bordi Drejtues.
David Rubin, president i Akademisë së Arteve dhe Shkencave të Filmit tha në një deklaratë se ka pranuar dorëheqjen e Smith dhe do të vazhdojë me procedurat disiplinore ndaj aktorit.
Takimi i planifikuar i bordit do të mbahet më 18 Prill./revistawho.com
