Ditën e sotme hymë zyrtarisht në sezonin e pranverës dhe pak nga pak duhet të fillojmë të bëjmë edhe ndryshime në garderobë. Pavarësisht se është punë e lodhshme, është bukur të fillosh të mendosh për tendencat e reja, si duhet të kombinosh dhe çfarë duhet të shtosh në garderobën tënde. Në sezonin e pranverës ndër të paktat gjëra që nuk mungon asnjëherë në veshjet e një vajze janë xhaketat xhins. Janë perfekte për pranverën, por ndonjëherë e kemi të vështirë të gjejmë kombinimin e duhur për to. Megjithatë nuk duhet të shqetësoheni sepse sugjerimet janë të shumta, mjafton të hidhni sytë rreth e rrotull, qoftë dhe tek vajzat e njohura në Shqipëri për të vjedhur disa ide. Xhaketat xhins mund të vishen me gjithçka, qoftë me një fustan, tuta sportive, apo dhe një palë xhinse për t’u veshur nga koka tek këmbët me të njëjtin material.
Një bluzë e bardhë me një xhaketë xhins është kombinimi perfekt dhe këtë gjë na e kanë treguar shpesh edhe vajzat e ekranit. Xhaketat xhins kanë qenë dhe do vazhdojnë të jenë trend dhe për sa kohë të keni një të tillë në garderobë, asnjëherë nuk duhet të shqetësoheni për atë se çfarë duhet të vishni në përditshmërinë tuaj. /revistawho.com
