Ylli Rakipi ikën nga “Ora News”, ja ku do ta shihni tani

Ylli Rakipi, themeluesi i gazetës “Albania”, e mbyllur prej disa vitesh, por me një emër në lëmin e gazetarisë së shkruar, duket se do të braktisë televizionin “Ora News” për një tjetër media audio-vizive. Bëhet fjalë për “News24”, me drejtuesit e të cilës Rakipi ka nënshkruar një kontratë së fundmi, për të nisur bashkëpunimin, mëson Qiriu.al. Burimet e Qiriu.al pranë “News24” bëjnë me dije firmosjen e një kontrate me gazetarin Ylli Rakipi i cili ka një eksperiencë 2 vjeçare në “OraNews”, që nga viti 2014, kur nisi punë në pozicionin e Drejtorit të Përgjithshëm. “Qiriu.al”, u interesua për të marrë vesh pozicionin që do të ketë Rakipi në “News24”, por kjo nuk është konfirmuar ende pasi palët janë hermetikë sa i takon kësaj pjese. Kontrata është firmosur pas nje takimi me drejtuesin e “Hysenbelliu Group”. Rakipi drejtonte edhe emisionin “Të paekspozuarit” në “Ora News”, në të cilin u shfaq videoskandali i kryebashkiakut të Dibrës Shukri Xhelili me një femër në hotel, të cilës i kërkonte favore seksuale në këmbim të një vendi pune. Kjo pasoi një bujë të madhe mediatike, si dhe politike. Qeveria menjëherë pas videoskandalit të dalë në media shkarkoi nga detyra Xhelilin, ai u burgos dhe pak javë më parë u mbajtën edhe zgjedhjet e reja në Dibër ku sërish u zgjodh një kandidat i mazhorancës në krye të Bashkisë, Muharrem Rama.