Një super vjedhje me një skemë që vetëm nëpër filma me aksion mund ti kemi parë deri më tani, ishte ajo e djeshme në pistën e aeroportit të Rinasit.
Nuk iu është dashur asnjë minutë më shumë, por për hajdutët me maska dhe paruke kanë mjaftuar vetëm 10 minuta për të realizuar skemën e vjedhjes që mesa duket e kanë patur të lehtë ta përfundojnë me sukses për shkak të mosreagimit të asnjë force policie private apo të aeroportit.
Në detajet e bëra sot publike nga kreu i policisë së Tiranës, Ervin Hodaj ngjarja ka ndodhur mes intervalit kohor 14:27 minuta dhe 14:33 minuta kur është njoftuar nga autoritet përgjegjëse të sigurisë së aeroportit.
Por çfarë ndodhi në kaq pak minuta?
Një person ende i paidentifikuar i veshur me një lejet fosforeshentë, ndoshta për tu dukur si punonjës i pistët së aeroportit ka prerë drynin e derës dhe pasi ka hapur atë, në territorin e pistës futet një automjet tip Mercedes Benz me ngjyre vishnje.
Autorët janë futur me makine në vendqëndrimin e automjeteve të shërbimit dhe kanë kryer vjedhjen e parave që ndodheshin në makinën e blinduar të shoqërisë “NAZERI 2000”. Vetë numri 1 i policisë së Tiranës sqaroi se pas daljes nga porta, autorët janë larguar në drejtim të aksit rrugor Rinas – Fushë Krujë – Vorë.
Në orën 14:33, 10 minuta pas thyerjes së sigurisë së rrethimit të jashtëm të aereoportit, Salla Operative e DVK&M Tiranë njoftohet nga ODM (Operatori i Drejtimit dhe Menaxhimit të Aeroportit), se persona të armatosur kanë hyrë me automjet brenda territorit të pistës së avionëve dhe kanë kryer një grabitje. “Menjëherë me marrjen e njoftimit shërbimet e policisë janë vënë në ndjekje të autorëve duke konstatuar një automjet tip MercedeS Benz i cili po digjej. Në ndjekie të autorëve janë vënë forcat Renea, Fnsh, forcat e Policisë së Drejtorisë Vendore të Policisë Tiranë, Komisariatit Kruje, dhe specialistët e Drejtorisë së Përgjithshme për Krimin e Organizuar dhe Krimet e Rënda në Policinë e Shtetit”, tha me tej kreu i policisë se Tiranës.
