Hetimi mbi vdekjen e papritur të aktorit të dashur të “Friends”, Matthew Perry, po nxjerr në dritë elemente gjithnjë e më shqetësuese. Në dokumentarin “Matthew Perry: A Hollywood Tragedy”, avokati Martin Estrada ka bërë publike mesazhe të dy mjekëve, Salvador Plasencia dhe Mark Chavez, të cilët tashmë kanë pranuar fajësinë për furnizim me ketaminë.
Sipas tij, këto biseda zbulojnë një qëndrim cinik dhe të ftohtë ndaj aktorit. Në një prej mesazheve, Plasencia shkruante: “Pyetem sa do të paguajë ky budalla. Le ta zbulojmë”, një shprehje që sipas avokatit tregon qartë se Perry shihej si një burim përfitimi financiar, e jo si një pacient në nevojë.
Matthew Perry u gjet i pajetë në tetor 2023, në banesën e tij në Los Angeles. Shkaku i vdekjes u përcaktua si “efektet akute të ketaminës”, një substancë e cila luajti rol vendimtar në tragjedinë që tronditi botën e Hollywood-it.
Përveç dy mjekëve, edhe persona të tjerë janë vënë nën akuzë, mes tyre asistenti personal i aktorit, Kenneth Iwamasa, dhe Erik Fleming. Të dy kanë pranuar se ishin të përfshirë në shpërndarjen e substancës që i mori jetën aktorit, i cili për publikun mbetet gjithmonë Chandler Bing.
Këto zbulime të reja jo vetëm që hedhin dritë mbi pakujdesinë e rrezikshme të disa profesionistëve të mjekësisë, por edhe ngrejnë pyetje të mëdha mbi mënyrën se si trajtohen personazhet publikë nga ata që duhej t’i mbronin.
