Bota e modës është tronditur nga zbulimi se Giorgio Armani, i cili u nda nga jeta më 4 shtator në moshën 91-vjeçare, kishte lënë pas jo një, por dy testamente – një të datës 15 mars dhe një tjetër më 5 prill. Përmbajtja e tyre u bë publike më 12 shtator nga disa media ndërkombëtare, duke hapur menjëherë diskutime të mëdha mbi të ardhmen e markës së tij.
Sipas dokumenteve, Fondacioni Giorgio Armani do të marrë kontrollin e shtëpisë së modës që mban emrin e tij, duke vazhduar trashëgiminë që stilisti nisi që në vitet ’70.
Një pjesë e planit është edhe shitja e aksioneve të kompanisë Giorgio Armani SpA. Brenda 18 muajve nga hapja e testamentit, 15% e tyre pritet të shiten, me mundësinë që blerësit të jenë një nga gjigantët ndërkombëtarë: LVMH, L’Oréal ose EssilorLuxottica. Në një fazë të dytë, tre deri në pesë vite më vonë, është parashikuar shitja e më shumë aksioneve – deri në 54.9% – ose një IPO, në varësi të zhvillimeve të tregut.
Në testament, Armani ka theksuar qartë se përparësi duhet t’i jepet grupit francez të luksit LVMH, në pronësi të Bernard Arnault, njeriu më i pasur i Francës. Dy opsionet e tjera të preferuara të tij janë L’Oréal dhe EssilorLuxottica, me të cilën marka Armani ka një partneritet afatgjatë.
Stilisti nuk e fshehu kurrë qëndrimin e tij për pavarësinë e kompanisë, të cilën e quante një “vlerë themelore”. Megjithatë, ai kishte vendosur që trashëgimtarët të marrin në konsideratë edhe kompani të tjera të industrisë së luksit me të cilat kishte bashkëpunuar ndër vite.
Armani ishte aksionari i vetëm dhe drejtuesi kryesor i Giorgio Armani SpA, të cilën e themeloi së bashku me partnerin e tij, Sergio Galeotti. Ai ruajti gjithmonë kontrollin e plotë të kompanisë, duke refuzuar shpesh oferta nga grupet më të mëdha të luksit botëror. Vetëm në vitin 2024, kompania regjistroi të ardhura prej 2.3 miliardë eurosh, duke u shtrirë përtej modës edhe në hotele, restorante, klube nate, kozmetikë e deri tek çokollatat.
