Kombëtarja e Futbollit udhëtoi sot nga Rinasi drejt Tiranës me një autobus të hapur që nuk ishte përdorur më parë për ceremoni të tilla. Të gjithë kanë pyetur ku u gjet ky autobus. Portalet e Maqedonisë shkruajnë se ai u mundësua prej qeverisë së Shkupit. Ishte Zv. kryeministri i qeverisë së Maqedonisë Festim Halili ai që u ka ardhur në ndihmë autoriteteve shqiptare në këtë ditë. Shqipëria nuk kishte një autobus të këtij lloji formati, prandaj kërkoi fillimisht mbështetjen e italianëve. Duke qenë se ata vonuan në një përgjigje, Halili që është edhe një tifoz i Kombëtares, e siguroi autobusin duke e marrë prej Ndërmarrjes Publike të Transportit në Shkup.
