Zbulohet opinionisti i parë i “Përputhen”, rikthehet në “Top Channel” Arjan Konomi

Disa ditë më parë, revista “Who” zbuloi se “Përputhen” do të rikthehet këtë sezon në ekranin e “Top Channel” si një emision i përditshëm nën drejtimin e Bora Zemanit. “Përputhen” ka në qendër vajza e djem të rinj që kërkojnë të gjejnë shpirtin e tyre binjak. Megjithatë ky produksion nuk do kishte kuptim pa praninë e opinionistëve. Sezonin e shkuar në poltronin e opinionistit ishte Olti Curri, por pasi ai u tërhoq ky vend ka mbetur bosh. Burime për “RevistaWho.Com” bëjnë të ditur se këtë sezon opinionist nuk do të jetë vetëm një personazh. Ne kemi arritur të zbulojmë se opinionisti i parë do të jetë Arjan Konomi, i cili rikthehet në ekranin e “Top Channel”, pas shumë kohësh. Vite më parë ai ka qenë pjesë e spektaklit të famshëm “Big Brother”, në rolin e opinionistit.