Një minorene 16-vjeçare nga Sukthi është zhdukur në mesnatë nga banesa e saj pa lënë gjurmë, tashmë prej 12 ditësh.
Policia raporton për një humbje, por dëshmitë e familjarëve flasim për një rrëmbim të mundshëm të vajzës së tyre Gazie Kazia përmes mashtrimit nga persona ende të paidentifikuar.
Vajza është zhdukur mesnatën e 17 majit duke lënë kompjuterin ndezur. Kjo është gjithçka ka kuptuar familja që si zakonisht ulet të hajë darkë rreth orës 20.30. Rreth orës 22.00 bien në gjumë dhe dritat fiken në shtëpi.
Nëna me tre fëmijët bien në gjumë, në një kohë që babai i tyre prej disa muajsh ndodhet në Greqi, për t`i siguruar më shumë të ardhura familjes së tyre.
Rreth orës 23.30, nëna çohet për të parë foshnjën e vogël dhe hap derën e dhomës së vajzës ku sheh se ajo qëndronte ende në kompjuter duke shkruar, pasi më herët i kishte thënë se kishte punë. Nëna i thotë të flejë dhe shtrihet përsëri.
Instikti i nënës bën që ajo të çohet përsëri rreth orës 24.00 për të parë nëse vajza e saj ka rënë në gjumë apo jo. Çuditërisht ajo nuk është. Ajo gjeti në tavolinën e kompjuterit 2 numra të regjistruar, të cilët i telefonon, por përgjigja që mori ishte: po na shqetëson në këtë orë të vonë të natës, raporton Shekulli.
Në orën 10.00 të ditës tjetër, nëna e vajzës denoncon në polici zhdukjen e minorenes. Policia e Durrësit i thotë se duhet të mbushen 24 orë që vajza të shpallet e zhdukur.
Në orën 24.00 të ditës tjetër vajza është zyrtarisht e humbur. Gruaja njofton burrin emigrant në Greqi, që niset urgjentisht drejt Shqipërisë.
Pas verifikimeve që bëri policia, rezultoi se njëri prej numrave i përkiste një taksisti që banonte një rrugicë larg vendit ku ndodhet familja Kaziaj. Sipas dëshmisë së gruas taksisti është një person i njohur pasi më parë ka hyrë në oborrin e shtëpisë së tyre, pasi ka punuar dhe në ndërmarrjen e ujësjellës-kanalizimeve.
Po sipas saj ai është një njeri që e njeh familjen. Sipas gruas taksisti ka deklaruar se e ka marrë vajzën natën së bashku me dikë që nuk e njeh dhe e ka dërguar te stacioni i plepave në plazh, ku dhe ka zbritur.
Gruaja shkon dhe më tej në dëshminë e saj duke deklaruar se nga fëmijët e shkollës ka mësuar se personi tjetër që ka shoqëruar vajzën te stacioni i Plepave në plazh, ka qenë një i afërm i taksistit. Në prokurori tregon nëna e Gazies kam dorëzuar dhe numrin e celularit të vajzës, kutinë e telefonit, numrat e telefonit te blloku i shënimit të vajzës, fotografitë, foto në kompjuter të një djali që dyshohet!
“Ne, tregon ajo, i kërkuam Prokurorisë që të merrte dhe kompjuterin e vajzës që të gjente të dhëna të tjera që mund të çonin në zbardhjen e ngjarjes dhe gjetjen e autorit të dyshuar, por prokurori thotë ajo na tha se në Shqipëri nuk ka ekspertë për të eksploruar në kompjutera. Pritëm nga policia dhe prokuroria të bënte diçka vijon më tej nëna e Gazijes, por kur pamë se nuk po bëhej gjë.
Burri i tensionuar shkoi t`i kërkonte sqarime taksistit. Në gjaknxehtësi e sipër u bë sherr. Imagjinoni një baba që i është zhdukur vajza dhe kur nuk ka një sqarim nga shteti se ç`mund të bëjë. Pas sherrit, policia ka kërkuar të arrestojë burrin tim. Mirë që më humbi vajza, por tashmë nuk kam as burrin. Po më shkatërrohet familja”.
Cila është 16-vjeçarja Gazije Kazija
Duke folur për vajzën e saj, nëna tregon se Gazie është një vajzë e rregullt. Ajo nuk ka munguar kurrë në shkollë, ka nota të mira dhe shoqëri të mirë. Ajo ja njeh shoqet dhe të thotë se të gjitha janë vajza të mira.
Gruaja konfirmon se vajza nuk ka pasur ndonjë djalë me të cilin shoqërohej, por kohët e fundit përdorte shumë celularin. Në shkollë shkonte së bashku me vëllanë dhe motrën. Nëse këto që them unë nuk do t`i besoni, shkoni në shkollën e saj dhe pyesni, tregon ajo. Tashmë ajo ka frikë edhe për fëmijët e tjerë.
Gruaja që ka mbështetje vetëm kunatin e saj, tregon se ajo që është më e trishtueshme në këtë histori, është fakti se familja Kaziaj ndjehet e kërcënuar edhe për fëmijët e tjerë. Nëna thotë se pas sherrit të burrit ka pasur kërcënime dhe se tashmë ajo nuk di se ç`të bëjë më dhe as ku të mbështetet, ndonëse bën me dije se kërkon ndihmën e shtetit për të hedhur dritë mbi ngjarjen./opinion.al
