Ndërsa prova e parë për Eurovision 2025 po afron në qytetin Basel të Zvicrës, emocionet për këtë edicion janë në rritje. Mes 37 vendeve pjesëmarrëse, një emër po dominon vëmendjen e publikut ndërkombëtar: Shqipëria! Kënga “Zjerm” nga grupi “Shkodra Elektronike” po shihet si pretendente serioze për të fituar festivalin.
Në një sondazh të zhvilluar nga portali i njohur Wiwibloggs, ku morën pjesë 18,951 fansa nga vende të ndryshme, Shqipëria doli në vend të parë. “Shkodra Elektronike” ka grumbulluar plot 2,106 vota – që përfaqësojnë 11.11% të totalit – duke lënë pas konkurrentë të zakonshëm si Finlanda dhe Suedia.
Në vendin e dytë, qëndron kënga finlandeze “ICH KOMME” nga Erika Vikman – një deklaratë e fuqishme për lirinë seksuale dhe vetëpërfaqësimin, me 1,969 vota (10.39%).
Ndërkohë, një tjetër surprizë e këtij viti është grupi suedez KAJ, që me këngën “Bara Bada Bastu”, një himn për saunën dhe kulturën nordike, zë vendin e tretë me 1,620 vota (8.55%).
Ky rezultat përfaqëson një rritje të madhe për Shqipërinë, e cila në një sondazh të mëparshëm kishte dalë e dyta në fazën gjysmëfinale. Tashmë, duket se mbështetja për “Zjerm” po vjen në rritje, duke e vendosur vendin tonë në një pozitë të favorshme për suksesin final.
Lista e ndjekësve përfshin edhe emra si Austria, Spanja, Holanda, Izraeli dhe Franca – të gjitha me më pak se 7% të votave.
A është ky momenti historik për Shqipërinë në Eurovision? Pjesa tjetër e aventurës mbetet për t’u parë. Por një gjë është e sigurt: “Zjerm” duket se ka ndezur jo vetëm publikun shqiptar, por edhe fansat më të flaktë të Eurovisionit në të gjithë botën.
