Këngëtarja Elvana Gjata, mori në vendin e dytë në Festivalin e Këngës në RTSH, duke mos arritur të përfaqësojë Shqipërinë në Eurovizion. Në Fest 63, ajo konkurronte me këngën “Karnaval” dhe u rendit pas “Zjerm” të grupit “Shkodra Elektronike”.
Pas shpalljes së rezultateve, Elvana iu drejtua fansave të saj me një mesazh inkurajues, duke u kërkuar që të mos ndihen të zhgënjyer.
“Jeta më ka mësuar që, edhe kur bie 10 herë, ngrihesh 11 herë,” deklaroi ajo.
Gjata gjithashtu përcolli një mesazh optimizmi, duke theksuar se asnjë lot nuk është i përhershëm.
“Ju dua të gjithëve pa masë. Faleminderit nga zemra. Mos harroni, jeta është një karnaval dhe asnjë lot nuk zgjat përgjithmonë. Ju dua shumë. Mos u mërzisni, të gjithë ju që keni ardhur të më mbështesni. Jeta më ka mësuar që, edhe kur bie 10 herë, ngrihesh 11 herë,” përfundoi këngëtarja para se të largohej nga skena.
