Çdo vit më 10 tetor bota ka Ditën Botërore të Shëndetit Mendor, e cila synon të rrisë vëmendjen për çrregullimet e shëndetit mendor dhe jo vetëm.
Sipas një raporti të ri të OBSH dhe UNICEF, rreth 1 në 7 fëmijë dhe adoleshentë të moshës 10 deri në 19 vjeç preken nga çrregullimet e shëndetit mendor, ku ankthi, depresioni dhe çrregullimet e sjelljes janë ndër më të zakonshmet.
Për më tepër, një e treta e çrregullimeve mendore shfaqen para moshës 14 vjeç dhe gjysma para moshës 18 vjeç.
Raporti thekson ndër të tjera rëndësinë e ndërhyrjes së hershme si një hap thelbësor për të ndihmuar fëmijët dhe të rinjtë të arrijnë potencialin e tyre të plotë në jetë.
Por fatkeqisht megjithëse nevoja për veprim është urgjente, pjesa më e madhe e të rinjve nuk kanë akses tek shërbimet që mund t’i vijnë në ndihmë.
Shumë të rinj që përjetojnë simptoma shqetësuese të shëndetit mendor nuk mund të marrin kujdes për shkak të pengesave sistemike, si mungesa e shërbimeve, kostot e papërballueshme dhe stigma që i ndalon ata të kërkojnë ndihmë.
Raporti thekson se mbështetja e shëndetit mendor të fëmijëve dhe adoleshentëve duhet të jetë një përpjekje kolektive.
“Shëndeti mendor dhe mirëqenia e fëmijëve, adoleshentëve dhe familjeve të tyre nuk mund të trajtohet në izolim. Ne duhet të integrojmë sistemet e shëndetit, arsimit, mbrojtjes sociale dhe mbështetjes së komunitetit për të ndërtuar një rrjet gjithëpërfshirës të shërbimeve të shëndetit mendor për të rinjtë,” tha Fouzia Shafique, Zëvendës Drejtore e Shëndetit në UNICEF.
Raporti bën thirrje për zëvendësimin e kujdesit institucional me shërbime të bazuara në komunitet që u lejojnë fëmijëve të rriten në familjet dhe komunitetet e tyre, duke siguruar vazhdimësinë e edukimit, marrëdhënieve sociale dhe zhvillimit të tyre të përgjithshëm.
